ده متسمي على اسمي
واحنا رايحين لموقع بير كان محتاجنا كان لازم نمشي حوالي 1.5 كم تقريبا ف مدق - وده عبارة عن طريق مش مسفلت ومش ممهد ومش مستوي ومش كل حاجة ومليان طوب ورمل وحصى وبلاوي زرقا وطبعا كمان ف وسط الصحرا مش ف شرم الشيخ بلازا يعني - المهم الطريق ده علشان نقدر نمشي فيه لازم العربيه تمشي بسرعة لا تتجاوز ال 10 كم/ساعة مع العلم ان العربيه مجهزة وامكانيات عالية وسواق محترف وكده بس نعمل ايه بقى
واحنا ف طريقنا للموقع ظهر قدامنا قافلة جمال - وللعلم الجمال هناك اكتر من البني ادميين - مش عارف ظهروا منين ورايحين على فين
اللي عرفته بعد كده ان القافلة دي كانت من النوق الحمر اللي عنترة كان خطفهم من الملك النعمان علشان مهر عبلة
الغبي كان جه مطروح لم اللي عايزه ماهم مترميين ف الصحرا بدل ما يتبهدل البهدلة دي
ما علينا
القافلة دي كان ماشي قبلها بمسافة جمل سابقهم اتقالي ساعتها ان اسمه الجرار وده الدليل من الآخر او القائد اللي باقي القافلة بتمشي وراه
المهم ان احنا متأكد علينا اننا بلاش نلعب مع الجمال بمعنى انه لو حصل حاجه زي اللي بأحكي عليها نقوم راجعين او واقفين لحد ما الجمال تاخد قعدتها وتمشي ف امان الله علشان نأمن شرها من ناحية ومن ناحية تانيه لحسن تكون ملك حد غبي يطلع علينا ويخطفنا ويطلب فدية ولا حاجة وساعتها مش هانلاقي اي مخلوق ممكن يدفع ف اتخن واحد فينا ربع جنيه مخروم
فطبعا اول ما شفنا عفيفي - وده الاسم اللي اطلقته على الجمل القائد من باب التريقة - قمنا مهديين السرعة اكتر علشان الباشا يعدي بس طبعا لأنه جمل اصيل فكان ماشي ابطأ من السلحفاه
ممل بجد
فأنا ربنا مش هداني على طيب ولساني المتبري مني قعد يتريأ على الحاج عفيفي
وكأنه سمع الكلام
مش عارف لقيته وقف فجأه وقام ملتفت قدام العربيه بالظبط وبص علينا نظرة فيها شر
فجأة السواق قام قايل اقفلوا الازاز بسرعة ولانه من اهل مطروح وهو ادرى منا بالجمال ومعاشرهم طول عمره قمنا قافلين الازاز بطريقه لا اراديه وبعدين استعدت الذاكرة وسألته : خير ؟
قام السواق قال : الجمل حطنا ف دماغه وقام موقف العربية
انا برضه مش اتنيل واسكت قمت مكمل : ان ان اااااااان ياعم حطنا ف دماغه مين ! ده جمل
لقيت الجمل فعلا جاي علينا فطبعا احنا اتاخدنا من الموقف
ياجماعة ده جمل مش بطه بلدي برضه
الجمل قام مكمل طريقه لحد مابقى قدام العربية بالظبط وقعد يلف حوالينا ويدور وانا طبعا مش عايز اوصف حالتي كانت ايه ساعتها
المهم السواق قال ماحدش يبص له علشان يمشي بسرعه فمحدش بص
كله بص قدامه ولا كأننا تلاميذ ومتذنبين والزبون عفيفي عمال يلف ومش راضي يمشي
وفجأه
قام لازق وشه ف الازاز بتاع الكرسي بتاعي
انا طبعا اترجيت ف مكاني
ايه يا جدعان! النظام كده مش باين عليه خير
اللي بنعمله ف الناس هايطلع علينا ولا ايه
السواق قام قايلي : لف وشك ناحيته ببطء
انا نفذت التعليمات بالحرف كأني عسكري أمن مركزي ف مظاهرة ف ميدان التحرير
وبعدين قام السواق مكمل : ابتسم وخللي السعادة تملى وشك
وطبعا عملت كده وانا باقول ف سري ايه الحوار الفاشل ده ما اقوم ارقصله بالمرة
لقيت الجمل قام ضحك انا بصراحه قلّـقت وقلتلهم الجمل ده مش ولابد ولا ايه؟
قالولي : ده مش جمل ده جملة (ناقة يعني ) فقلت :اوباااااااااااه
وكملوا : وحامل كمان
الناقه طلعت جايه تتوحم عليا
فلو لقيتوا جمل شبهي سلموا عليه وعاملوه كويس ولو سألتوه على اسمه هايقولكوا ان اسمه
ولــــــــو
اصله متسمي على اسمي..
posted by ولــــــــــو @ 7:32 PM
24 Comments:
سلام عليكم
بدأت تزهق مني؟؟ :) عموما أتمنى لأ و أنا بس كنت جاية أقوللك مبروك على البلوج الجديد
و على فكرة بأة... بس المرة دي أنا متنرفزة شوية
:)
أنا برده كنت هعمل بلوج تاني بس مش عشان أسرد فيه زيك، بس مجرد إني حسيت إن البلوج كدة هيبقى مليان أوي وأنا ممكن أخلي الحاجات اللي بحبها أوي في مكان والباقي العادي في مكان تاني
عموما بصرة :)) بس أنا هأجل الفكرة دي شوية أحسن
عارف إيه كمان؟؟ كنت بشوف التاج القديم بتاعك في البلوج التاني عشان كنت هعمل بوست عندي ليه، بس لقيتك كمان بأة فيه تاج تاني!!!
إيه الرغي دة؟!! معلش بقالي كتير مش كتبت بس هسكت أهه
و هقوللك على البوست بتاعك إنه حلو أوي
:)
و مسخرة أوي أوي وبجد قعدت أضحك عليه جاااامد
بس فعلا الجمل معروف بإنه لو اتضايق بيكون مفيش بعده و ممكن يقتل اللي قدامه لو استفزه، كمان معروف إنه أكتر حيوان قلبه أسود و ممكن يفضل فاكر الشخص اللي ضايقه لعشرات السنين..و ينتقم لما يشوفه بعدها
كنت بحاول أقول معلومة سمعتها كتير :) بس فجأة لقيتني زي مامة الجمل وبعتالك رسالة تحذير
وصحيح هو اسمك في البطاقة "ولو"؟
:p
عموما حمدلله على السلامة تاني!!! و حاسب بأة مش كل شوية يحصللك موقف صعب كدة
:)
بلوج بدايته لذيذة.
hope u the best in ur life
هههههههههه
يخرب عقلك يا حاتم ده انت طلعت مشكلة يبني
هي المواهب دي كلها كانت مستخبية فين
:D
ايوة ياعم محدش ادك
الناقة الجرار بحالها معجبة بيك ههههههه
يللا شد حيلك كده وشوفلك نقنوقة صغيرة عشان نفرح بيك يا توما
:D :D
برضه مش هقول عزيزي
أنا مش هزعل لاني مش أول تعليق لاني قريت المقال قبل ما حد يقرا
لا والله انت عارف اني مش بفكر كده
المهم أنا اعرف انك مبتخفش بس هل للتسميه علاقه بفيلم جاءنا البيان التالي ولا لأ؟
أنت عارف اني مكنتش اعرف ان افروال بتتكتب كده بالانجليزي بس انا لما دورت في القاموس وانت عرفني شاب يهوى الريسيرش لاقيت انها ممكن تتكتب كمان من غير السي
المهم فاكر أول مره لبست انت فيها افروال؟
أنا اول مره لبسته كان عشان الورش في اعدادي هندسة لاني مكنتش مقتنع أني ألبس بلطو أبيض وكان شكلي عار أنت عرفني كنت أيامها لسه جسمي سمبتيك وكانوا بيسموني ميني عشان اي حاجه كنت بستعمل منها الحجم الميني حتى الصابونه اللي كنت بستعملها عشان انضف ايدي بيها بعد الورشه
قال يعني كنت بشتغل بايدي
ولما افتكرت الموضوع ده أفتكرت كمان لما شفت المخرطة أول مره في الكلية وشفت اللي عرفت بعدها انه الرايش وقلت للمشرف
أوه الله شكلها كتير حلو ممكن أحتفظ بجزء وكانت الطامه لانه بصلي وكأني من كوكب تاني
بس والله كان شكلها حلو كانت شريط طويل حلزوني زي ما تقشر برتقانه وتخلي القشر جزء واحد
على ذكر البرتقال أنا بقيت بحس انه مش حلو
المهم كفايه عليا رغي كده بس حاجه أخيره بالافرول أنا أحب أوثق من مكاني ده اني كان شكلي أسواء من أرتدوا الافروال على نطاق العالم
أخيرا بليز بليز خلي الكومنت لأي حد عشان أنت عارف مبحبش أسيب كومنت بلينك
على الهامش أنا مش قلتلك أن كل أنثى بتشوفك بتعجب بيك حتى لو كانت من ذوات الأربع
باي مش تحياتي
ياسلام كمان الجمال امال البنات عامل معاهم ايه
بس بجد بوست جميل جدا ولذيذ
وبعد كده تحترم الجمال عشان مش كل مرة هتعدي على خير
الطيب احسن
ههههههههه
حاتم بتضحك للناقه وهى بتضحكلك
ماشى ماشى
وافرض بقى ابو العيل كان شافكوا فى المنظر الرومانتيكى ده كان عمل فيك ايه؟
حلوه اوى
تحياتى
شيماء:)
هههههههههههه
ربنا سترها
هههههههههههه
كويس انها مخطفتكش
معملتش بقى فيها عنترة ليه يا عم وكملت تريقة كان زمانا دلوقتى بنترحم عليك كلنا
قال اضحكلها قوى قال
ههههههههههههههه
الف مبروك المولود الجديد
تحياتى
هبة
wish i were a butterfly
وعليكم السلام ورحمة الله وبركاته
انا ؟ والله ابدا بالعكس دا انا بانتظر بجد الكومنت بتاعك علشان اعرف ارائك ف النعكشة اللي ببعثرها على البلوجات
الله يباركي فيكي انا متشكر جدا والله كلك ذوقك
ياساتر يارب اكيد عملت حاجة مش عجبتك انا عارف نفسي مش بأعرف اتصرف
على العموم انا عارف انك هاتسامحيني
واااااااااو
بلوج جديد؟ طب فينه واسمه ايه
هو لو بالوصف ده مش هايبقى فيه كلام خالص
اصلك مش بتكتبي حاجه مممكن نقول عنها عادي
كلهم مش عادي بجد
ياريت الفكرة الجامدة دي تدخل ف طور التنفيذ ف اقرب وقت ممكن
ده مطلب جماهيري على فكرة
يااااااه
دا انا كده اليوم ده كان يوم حظي كل المتابعة دي اتمنى ان وقتك كان كويس ومش ندمتي بعدها على انك ضيعتي كل الوقت ده على كلام والسلام
بالنسبه للتاج انا مستني التاج الاول من فترة ومش راضي ينزل بس لعل المانع خير
"لعل" ناخد بالنا اقولك فكرة خللي التاج الاول يكون افتتاح البلوج الجديد واللي موجود دلوقت هو اللي لما انزل المرة الجاية يكون موجود ان شاء الله
حلوة التدبيسة دي
خلاص اتفقنا
يااه انا كمان نسيت انا المفروض ارد على ايه
هههههه
اااااااااااااااه البوست
مسخرة مرة واحدة؟ وده كويس ولا مش كويس؟
كويس انك ضحكتي على الموقف ده انا اصلي كنت عايز اضحك بس صعبت عليا نفسي ساعتها
ههههههههههههههه
الله يطمنك
على كده لو كانت عفيفي اتضايقت مني يبقى المفروض مش امشي ف الصحرا تاني العمر مش بعزأه برضه
بس ازاي دي كويسة معايا خالص
ولا بتجر رجلي بس
كويس انك نبهتيني
اسمي ف انهي بطاقه؟
اصل انا عندي بطاقتين
بس الاتنين اسمي فيهم حاتم
المشكلة ان الموقف ده مش يعتبر صعب بالنسبه لحاجات تانيه هاتبقي تقريها
بس الحمد لله ربنا بيسترها
انا بجد عاجز عن الشكر
وانا كمان والله اتمنالك كل الخير ف حياتك
indeed
مش هزار يعني
آلام وآمال
صديقي كيف احوالك
يارب تكون اتوفقت ف الامتحانات
والله المواهب موجودة بس محمود بس عايزة اللي يكتشفها
ماتيجي تتبناني وتكسب فيا ثواب
محدش ادي؟ ياريت كان ساعتها يبقى فيه حد ادي وبعدين المرة الوحيدة اللي الاقي فيها حد يعجب بيا تبقى جمل وحامل كمان
ههههههه
موقف مش لذيذ ابدا
مش كده؟
نقنوقة مين ؟
ياعم لا انا مش ليا ف الحاجات دي انا وهبت نفسي للوطن
دايما منورني يا صاحبي
عزيزي العزيز المعز لدين الله المقيد اعزه الله واعز من اعزه
انا عارف؟
اه طبعا انا عارف
والله مابتفرق معانا الشكليات
جاءنا البيان التالي؟
مش فاهم
ااااااااه عفيفي
وكمان راس حربة
الله يمسيك بالخير يا بيبو
هههههههه
تصدق ممكن مش جه ف بالي بس انا ارتبط فعلا ف دماغي ان اي جمل يبقى اسمه عفيفي
ههههههه
بس لحسن عفيفي او حد يعرفه يكون بيقرا يزعلوا ولا حاجة
هو ممكن يتقال كده او كده بس انا معلقه معايا من ساعه ما ايه.سي. كان بيقول عليه كده
كافاروووووووووول
كانت ايام
ايه الذكريات الاليمة دي
بتفكرني ليه
انا كنت بألبس بالطو الحكيم
مانا كل صحابي من صيدلة بقى
بمناسبة البرتقال
انا مش بأكله انت عارف ولا ليا ف اي نوع من انواع الفاكهه
علشان كده العيال ف الشغل بيتخانقوا عليا اقعد معاهم
تصدق اني لما سيبت الشغل الاولاني قعدت فترة مفتقد احساس انك تلبس اوفارول بس يمكن انت بتكرهه علشان انت كنت عارف ان ايامك ف الحقول معدودة وانك مش حاسس انك تكون غير مهندس مكاتب
مع اني كنت شايف ان الاوفرول بيضفي لمحة وسامة على وسامتك
هههههه
يا بتاع الجاز
موضوع اللينك ده ابقى انت عدّله على راحتك انا عملته على الديفولت
على الهامش
مع اني كنت لابس نظارة الشمس
يعني الشعاع اللي خارج من عينيا مش وصلها بس اعمل ايه
مش بأيدي انت عارف
هههههههههههههه
sahr
اولا اهلااااااااااااااااان عاش من قرالك تعليق
ثانيا
تصوري انتي بقى
انا مش هاتكلم
والقطنه مابتكذبش
بس اليومين دول البنات مش عارف ايه اللي حصل ف نظرهم ولا كأني معدي
هوا او شويه سحاب معدي فوق دماغهم
هههههههههههه
والله انا من موقعي هذا بأصرح ان انا بأكن كل تقدير واحترام للجمال وكل الفصايل الحيوانية
ربنا يكفينا شرهم هو احنا ملاحقين على البني ادميين لما كمان هايطلعولنا الجمال
يارب دايما منوراني
همسات دافئة
ههههههه اه والله تصوري
دا اللي اسمه الاعجاب من اول نظرة
لأ اطمني ابو العيال شكله كان مش موجود وتقريبا القافلة دي كان كلها حريم علشان كانوا ماشيين بطريقه ملفته من الاخر شكلهم كانوا عايزين يتعاكسوا
هههههههه
بجد بيسعدني مرورك
a long distance
اولا شرفتني لأول مرة
وبعدين
تخطفني مين؟
هي البلد سايبة
ده لولا انها قالتلي ان غرضها شريف انا كنت عملتلها محضر تحرش
قال تخطفني قال
ده على رأي محمد هنيدي
دانا اشيل كلمة ذكر من البطاقه
منورني
اتمنى تكرار الزيارة
doba
بصراحة انا ف الحاجات دي عيل جدا
وبعدين دانا مش لحقت اقول حاجة وحصلي كل ده اومال لو كنت كملت بقى
بس تعرفي مش كنت اعرف ان الجمال زعلها وحش للدرجة دي
ههههههههههه
انا كمان والله ضحكت اوي لما افتكرت
دانا مش باضحك مع ابويا وامي
لما اضحك اضحك مع جمل
دايما مشرفه ومنوره ورافعه معنوياتي
مش محتاجه ناقه صغيرة ليوسف؟
انتي تأشري بس
والله مترميين ف الصحرا بس بصراحة مش هابقى واثق ف أخلاقها
ههههه
ههههههههههههههههههههه
مسخرة بجد
بيقولوا عليا فى البيت هبلة دلوقتى
البلوج دا شكله هيبئا جامد
ان شاء الله
مبروك ياحات البلوج الجديد والشغل الجديد .. هو انت بتشتغل على بريمة بترول ولا ايه ؟؟
هههههههههههههههه
انا بجد وقعت على الارض من الضحك يا حاتم
مبرووك البلوج طبعا و ربنا معاك انا مش انت هتلاحق ازاى على الشغل و التدويين
و بطل تعاكس فى الجمال يا حاتم
مش معقولة يا حاتم أهلى جم من جوة الأوض يسألوا فيه إيه من كتر ضحكى
بس جامدة التعليمات اللى بتتقال علشان خاطر الجمل دى واضح إنها أعجبت بيك و انت بس عمال تقول عليها عفيفي.. الحمد لله إنها سامحتك :)
هههههههههههه
مش ممكن اللى بيجرى لك ده يا حاتم ....انت عملت قلق في البلاد الهادئة دي
مرة تتصور مع كليوباترا و مرة جملاية معجبة بيك لا و كمان بتتوحم عليك
عايش حياتك انت هناك
بس ربنا يستر
ابقى خلى بالك بقى
مش عارفة اقولك خلى بالك من انطونيو و لا من الجمل جوز الجملاية دي
تيك كير و بطل شقاوة العمر مش بعزقة
ههههههههههههههههه
تحياتي
break
هههههههه
طب كويس ان اللي بيقول كده ف البيت
اهم برضه اهلك ومننا وعلينا مش احسن ما الواحد شكله مش ولابد قدام جموع المدونين كده بس برضه انتوا عيلتي وكفايه احراج لحد كده
لو البوست ده عجبك يبقى ممكن يعجبك حاجات تانيه
ربنا يسهل
منوراني
bocycat
ايه ده هو انا مفضوح كده؟
لا الشغل القديم هو اللي كان بريمه بترول
دلوقت بقيت اروح زيارات منفصلة متصلة
آدي اخره ان الواحد يبقى مهندس جاز
مش كنت طلعت مهندس معماري احسن
اشطه النضافه ووالله فرق الفلوس مش كتير
يارب دايما متبعاني
sa'7so'7te
ههههههههه
والارض حصلها حاجة؟
الله يبارك فيكي وبعدين مش مهم اني الاحق على المدونه على قد ما الصعوبة اني الاحق على المدونين امثالكم
ههههههه كل ما اغيب اسبوعين الاقي سيل بوستات من كل صوب وحد
طب مانا كنت مرمي ف البيت بأدعي يارب بوست جديد عند اي حد وكنتوا بتذلوني لغاية ما البوستات الجديدة تنزل
خلاص الوحي مش راضي يسيبكوا؟
ربنا معايا بقى
وبعدين الصحرا بتعمل اكتر من كده انا كان اللي يوصفني ساعتها يقولك بكتيره بتاع انابيب ويكون مجاملني كمان فأكيد مش منظر بس الصحرا ياما بتلم
بيقولوا سايكو
ههههههه
ليه كده القلق ده
انا انصحك بعد كده تجيبي اهلك يقروا معاكي وتخلصي
ماهو اصلهم عارفين ان الجمال ف المنطقة دي عينها زايغه
بس ياريتني التزمت باالتعليمات مش كان حصل ده كله
لا عفيفي ! كله الا عفيفي دي ملاك .تسمه. ملكه جمال الجِمال
الحمد لله على كده
انا اصلا اي شغل يجيلي هناك تاني مش بأروحه
العمر مش بعزأه جوز عفيفي يكون شم خبر ولا حاجه
منوراني
الحلم العربي
طب انا مالي؟
البلد مش قادرين يتكيفوا مع الاوضاع الجديدة
وبعدين مش تخافي هما عندهم ثقة عمياء فيا
عارفين اني شاب مكافح ورايح اشتغل مش بتاع لف ودوران
اعمل ايه؟ معجبين اكسفهم يعني
اينعم العلاقة بيننا لا يمكن تكتمل بس انا مش اقدر اقولهم كده
يعملوا حاجه ف نفسهم ولا حاجه
متشكر جدا لمتابعتك
Post a Comment
Subscribe to Post Comments [Atom]
<< Home