فيلم هندي
استمرارا لعرض الفيلم الهندي اللي انا عايش فيه واللي اسمه " اكتر من كده ويزيح ربنا " بألاقي نفسي ف موقف لا احسد عليه
بعد ما خلصنا اكتر من 500 شيكارة من الكيميكالز بتاعتنا - والشيكاره بتاعتنا قد شيكارة الاسمنت بالظبط -ودول اخدوا حوالي 14 ساعة علشان يتحضروا وبعد معاناة مع شباب بدو مطروح اللي المفروض بيساعدونا ف تخليط الكيميكالز دي واللي بسهولة جدا بيجيبوا للواحد شلل بكل مساحاته " نصفي ورباعي وسداسي " من غبائهم وبرودهم وبعد حوالي اربع ايام من غير نوم قررت اني مش هأكمل الشغل لحد الآخر واللي هو فاضل منه ضخ الكميات دي جوه البير
المهم ان الساعة كانت حوالي 3 الفجر وراجع الكرافان بتاعنا - الكرافان ده صندوق متحرك زي اللي كان ساكن فيه عادل امام ف فيلم كراكون ف الشارع - ام هند انا طبعا راجع الكرافان ومحطم جسديا وبأنهار ومش حاسس باللي حواليا
يادوب لقيت السريرقمت رامي نفسي عليه وواقع زي عمارة لوران اللي وقعت ف اسكندريه
تقولوش جبل بيتهاوى يا ولاد ودي اخر حاجه افتكرها لحد كده وهايطلع واحد يقولي وفين المشكله
اقوله انا جايلك ف الكلام
الكرافان اللي كنا فيه كان فيه سرير واحد بدورين واحنا كنا 3 على اساس ان دايما واحد من الاتنين المهندسين يبقى صاحي والتاني بينام على السرير الارضي مش العالي
وانا الحمد لله ربنا اكرمني بنعمة النوم الخفيف - وانا كنت فاكرها نقمة لحد اليوم ده - المهم انا خلاص رحت ف سبات عميق والاقي جثة ظهرت ف الظلام
طبعا مش شايف ملامح وانا معتقد ان الدنيا امان وقلت تلاقيه زميلي جاي ياخد حاجه او تعب وجاي يريح شوية ماهو برضه الانسان طاقه وقدرات او ان النهار طلع والولد بتاع النظافه جاي يرتب الاوضه
لقيت الجثه المجهولة دي جايه ناحيتي قلت لأ انا اكيد بأحلم ماهو الشغل الكتير بيخلي الواحد يتهيأله حاجات
لغاية ما وصل الكائن المجهول لحد السرير ولاقيته بيزقني لجوه جنب الحيطة فتأكدت انه زميلي طالبه معاه غلاسه وبيرخم عليا فقلتله من غير ما حتى افتح عيني : انا بصراحة مش قادر حتى اتكلم فمش عايزة رخامة خالص دلوقت
يالا يا بابا روح شوف اكل عيشك زي الشاطر علشان عمو حاتم مش يزعل منك
لقيت الجثه دي ولا كأني بأتكلم وقام نايم جنبي على السرير وانا بصراحة موتي وسمي اللي ينام جنبي ده غير ان السرير مصمم على انه بيساع فرد واحد
انا بصراحة خفت على السرير يجراله حاجه وده عُـهدة برضه والناس مديهولنا امانة
قمت قايل ف سري هيّ الليلة باينه من اولها ومش فيها نوم يبقى نقضيها تهييس وكل ده برضه وانا لسه مش فتحت عيني فقلتله طب نتفاهم وبعدين مش هيّ دي الطريقة اللي تسيطر بيها على مشاعري
وقمت منور الاباجورة ويال هول ما رأيت
لقيتني برّقت وعيني طلعت لبره وجالي حالة من البلاهة المصحوبه بفقد ف الذاكرةوقلت لنفسي : هو انا فين بالظبط ؟
لقيت الجثه اللي نايمة دي شخصية غريبة قمت قايم منفوض وانا بأصرخ : هو ايه اللي جرى ف الدنيا يا جدعان
السواق اللي معايا صحي وقام قايللي : مين ده يا هندسة
قلت بكل تلقائية : والنعمة ما اعرفه أهي بلاوي بتتحدف علينا
اللي يغيظ بجد ان الكائن ده ولا كأنه نايم ف بيت ابوه
كان جثه هامدة مع انه لسه زاققني من اقل من دقيقتين
انت يا حاج انت يا لوح انت يا لطخ
لا حياة لمن تنادي
كأنه منوم مغناطيسيا
انا قمت رايح جايب الازازة بتاعة المية ودالقها على وشة مش لقيت اي استجابه ولا حتى هز ايده
انا بصراحه اتغظت جدا قمت جايب الخوذه بتاعتي وحادفها عليه بدأ شبهه استجابه
جمعنا كل حاجه ممكن تتحرك ف الاوضه ورميناهم عليه
المهم صحي بعد ما فضينا كل اللي ف الاوضه وكان ناقص نرمي التكييف عليه كمان
الباشا قايم يتمطع وبيتكلم بلغه غريبة عجيبه - بتاعة بدو الصحرا - بطريقه تحس معاها اننا اللي دخلنا اوضته وقلقنا منام حضرته ونمنا على سريره
انا بقى مش بقيت قادر استحمل فقلتله والشرر بينط من عيني : انت يا اخينا انت كلمنا لغة نفهمها
قام اتكلم وياريته ما اتكلم
الباشا كان راكب حماره ف وسط الصحرا الساعة 3 الفجر قام الحمار عطش فقام جايب ليه يشرب وقال يخش هو يرتاح شويه علشان كان بيلف من الصبح
قام نازل ترانزيت ف اوضتي وعلى سريري
من بين كل المواقع اختارني انا
فالسواق قاله : طب مش فيه واحد نايم في السرير
قام رد عليه رد جمدني ف مكاني قاله : وماله امال انام يعني على الارض
فطبعا بكل غيظ قمت رادد عليه وقلتله : لأ العفو اصلك واخد على عيشة القصور
المهم الاخ العرباوي راسه والف جزمه قديمة انه مش يمشي الا بعد ما ينام وطبعا الناس هناك مش بتحب تحتك بالبدو قاموا نقلوني ف اوضه تانيه
اول ما دخلت فيها
قمت طلعت نمت على السرير العالي
posted by ولــــــــــو @ 11:15 PM
21 Comments:
:)))
ربنا يعينك في مغامراتك دي
أنا شخصيا كان زماني جالي سكتة قلبية و خلصت نفسي
و أخيرا عرفنا الوجه الآخر للباشمهندس لما يتنرفز ممكن يعمل إيه
:))
بس والله حلوة المواقف دي. بتدي طعم للدنيا عشان مش تكون روتينية مملة
تحياتي
بجد ليك وحشه
انا لقيتك عندنا فى المركب قلت بس اكييد منزل بوست جديد
:)
اما بأه عن العرباوى فالراجل الصراحة مغلطش
مش كفايه انه ساب الحمارة بره تنام فى الطل...احمد ربنا بأه
يا نهار ابيض
الراجل ده نرفزنى اوي
بجد معقولة فيه ناس كده
ده حتى لو معتبر نفسه عابر سبيل يعني مش المفروض يستأذن الناس الأول ؟؟؟
ربنا يكون في عونك
انت كده هتقلقنا عليك في البلاد العجيبة دي
صحيح أكل العيش مر
هههههههههه
تحياتي
عزيزي
ههههههههه
بس أنا متخيلتش أن ده يطلع منك
كده برضه فين حب لأخيك ما تحبه لنفسك وفين ألتمش لأخيك سبعين عذر واحد نام جنبك سيبله السرير من هدوء وروح دور على حته تانيه
فين الهدوء والسلام والسكينة
ثم أنا مكنتش اعرف أنك متحبش حد ينام جنبك؟
سلام
اه اوعى تحتك بالعرب خد بالك يامعلم مبيتفهموش والمشكله انهم مش حسين بالانتماء خالص وده ناتج من سياسات الحكومه
دول ياعم بيمشو بالعربيات من غير نمر وبيعدو على اليجان ومحدش بيكلمهم
ربنا معاك
ويستر طريقك
تحياتى
هههههههههههههههههههههه
ربنا معاك بجد
عاوزة اقولك ان انا قلبي وقع في رجليا اصلا وانت بتحكي وفكرتها جثة بجد
دا انتوا بتتعبوا جامد هناك
كنت مستنية اسمع فيلم رعب
ياخساره
خيرها في غيرها
الله يفتح عليك تصدق
انا كان كابس عليا النوم بس البوست
ده صحصحنى حقيقى كل مغامره
ومغامره لها العجب بس حاجه ترعب
كويس ان كان معاك السواق
:) ههههههه
دى مدونه دمها خفيف جداااا
تحياتى وتقديرى
موقف لا تحسد عليه يا بشمهندس الواحد اصلا وهو نايم بيهيس فما بالك بخثة داخلة عليه هيتجنن
ربنا يكون فى عونك
واسلوبك حلو اوى فى الكتابة
دى اول مرة ادخل بس شكلها هتتكرر
wish i were a butterfly
الصديقه فراشه
انا شخصيا جالي فعلا سكتتين وشلل ومتكلم على ذبحة بس ظروف الشحن معطلاها
اصلي باعت اجيبها من فرنسا
لا انا وحش
وحش مش كويس يعني مش وحش اللي هو شرس
بس انا فضلت ماسك اعصابي زي مانتي شايفة لكن كل واحد ليه طاقه وانا بطاريتي فضيت على الاخر مع الراجل ده
اه حلوة
حلوة لدرجة اتمنى مش تتكرر
انا اعشق الحياة الروتينيه
انا اصلا شاب روتيني
تبدلي؟
تحياتي واتمنى تكوني دايما ف الخير
sa'7so'7te
ربنا يكرمك انتوا اكتر والله
اه ده من فترة كبيرة دلوقت بس ان شاء الله جاي ف اقرب وقت
انتظروني
ناااااااااااااااااااااااعااااااااااااااااااااام
الراجل مش غلط؟
امال عمل ايه؟
اه ماهو ده اللي ناقص يجيبها تنام هي كمان ف الاوضه
طب تصدقي انا عندي الحمارة ارحم
على الاقل معروف انها حيوان مش واحد متخفي ف زي بني ادم
وبرده الحمد لله على كل شئ
نورتيني
الحلم العربي
معلش روّقي دمك
بس والله فيه كده
انا اتأكدت انه بني ادم
لااااااا مش تقلقي
انا افوت ف الرمل
هو ده الموجود
الحديد اسعارة مولعه وكمان مش موجود ف السوق
اكل العيش مش مر
ده دلوقت مستحيل
انسان مقيد
بصراحه ده لو اخويا كنت اتبريت منه
اسيبله السرير
ليييييييييييييييييه؟
المشكله انه لو فيه مكان تاني كان هو راح من الاول
لكن انا اصلا قعدت 5 ايام صاحي لحد ما اخدت دوري ف السرير
السراير ف الموقع زي العيش ف مصر
ايوة مانا قلت كده
فين السكينه اقطع بيها دماغه اللي فكرت تقلق نومي
مش تعرف اني مش باحب انام جنب حد ؟
يمكن علشان انت مش بتشوفني وانا نايم
سلااااااااام
ضد الظلم
انت هاتقولي
ده كبرات الشركة مرسيني على الدور قبل ماتحرك من مصر وقالولي بالحرف لو اختفيت نسلم التأمين لمين
يعني من الاخر كلب وراح
وفعلا كل ولائهم ل ليبيا ومش بيعتبروا نفسهم مصريين حتى لكنتهم لكنه ليبي
متشكرين يا كبير ودايما منورني
قلب ينبض
بتضحكي !!!!
مااااااااااااشي
لا لو كانت جثه بجد انا كان زماني زيها
وارتحت من وجع القلب ده
بنتعب؟
وانهوا تعب
يالا كله علشان خاطر مصر
اياكش يطمر
ههههههه
sahr
فيلم رعب؟
بصراحه قمه المساندة
ربنا مش يحرمني منكوا
ان شاء الله المرة الجايه ابقى اجيبلكوا فيلم رعب
ولا بلاش أأجره ارخص
منوراني بعد غيبه
klmat
اي خدمة
مش احسن من فنجان قهوة بالذمة
بس بجد حاجات كبرتني خمسين سنه يعني انا كده بالميت عندي 75 سنه
الحمد لله مع انه كان ف شبه غيبوبة واللي طالع عليه يقولي مين ده ياهندسه مين ده ياهندسه
حسسني انه ابويا وقفشني مع عشيقي
حاجة تنرفز والله
ربنا يخليكي ده من ذوقك
dramaqueen
طبعا مشرفاني لاول مرة
ويارب مش تكون الاخيرة
بالظبط
الواحد نايم مهييس خلقة
انا ناقص
بس يالا صاحبي دايما يقوللي ان اللي بيحصلنا ده تكفير ذنوب
اتمنى يكون صح
انا متشكر على ذوقك وبجد اتمنى مش تكون الاخيرة
شكرا
هههههههههههههههههههه
ايه ده يا حاتم
جامد اوى الموقف ده
و انت يا حرام اللى كنت ضحيه فى الاخر
اكيد هتحرم تنام على السرير اللى تحت
انا اول مرة ادخل البلوج بتاعتك بس واضح انى هبقى من النزلاء الدائمين و احتمال اشتريلى كرافان عندكم بس هقفل الباب كويس عشان محدش يدخل ينام عندى بصراحة انت موهوب قوى
فى انتظار مغمرات اخرى
على فكرة انا عايزة اقول حاجة مش كل بدو مطروح اغبيا و تنحين اصل انا عشت سبعتاشر سنة من عمرى هناك و عارفاهم كويس هما ساعات بيستغبوا بس في منهم اذكيا كتييييييييييييييييير
Post a Comment
Subscribe to Post Comments [Atom]
<< Home