القوي فيه اللي أقوى منه
مش عارف اشمعنى بيحصل معايا كده؟
انا من بين 75 مليون فرد بيلازمني حظ لذيذ جدا
طبعا الاسبوع كله كان اكتر من متعب بس كله يهون بالمقارنة بال ويك إند
طلعنا من الموقع اللي كنا فيه علشان طلبونا ف موقع تاني
مش مهم اني مش نمت الاسبوع كله الا اقل من 12 ساعة ومش مهم البهدلة والارهاق ومش مهم بُعد المسافات بين المواقع ومش مهم ان العربيه لانوس والمطب معاها بيلزقني ف السقف فما بالك الصحرا والطوب والحصى والبلاوي الزرقا دي
لكن على الاقل نراعي شوية بقى والظروف مش تبقى كلها واقفة ضدي كده
وصلنا الموقع حوالي الساعه 7 بالليل وطبعا كنت بأنهار كالعاده . المهندس المسئول قال مش هانشتغل غير بعد ساعتين قلت اشطه جدا انا مش محتاج اكتر من كده
أديها ترييح علشان اللي هاشوفه بعد كده هايعلمني الادب وكمان الجو تلج فالواحد يلحق يتمتع شويه بالسخونه واحساس الدفء
الراجل ظبّطنا بصراحة
ادانا كرفان فيه اربع سراير مره واحدة. كتر خيره مع اني استغربت
العادي انهم يقولوا مفيش اماكن والعدد محدود واغتنم الفرصة واحجز مقدما والكلام بتاع مسرحيات القطاع الخاص ده بس الراجل اكيد رأف بحالنا لما شاف الحاله المزريه الللي احنا عليها
طبعا راجع للرجالة كأني فتحت عكا
معايا كرفان اربع سراير مرة واحدة دي حاجة تتكتب ف تاريخ الشركة
انا بأقول بكل براءة : يالا يارجالة ننام
لقيت كلهم ف نفس واحد كأني ف كُـتّـــاب الشيخ محفوظ : لأ ياعم مش جايلنا نوم احنا هانقعد ف العربية شويه لحد معاد الماتش
انا بأستغراب من النهم الرياضي اللي ظهر عليهم فجأة: ماتش مين النهاردة؟
قالوا: ماتش الجونة والحناوي ف ربع نهائي دوري المظاليم
انا وعلامات الدهشة ماليه وشي: مظاليم ليه كفالله الشر ؟ ومين اللي ظلمهم لا سمح الله وبعدين دي فرق ف مصر هنا؟
برضه كلهم ف نفس واحد يدل على أداء جماعي رائع: انت ايه فهمك ف الكورة اصلا خليك مع برشلونة اللي هاياكل دماغك
خش انت نام انت بقالك اسبوع مش نمت
ياربي ايه الحنية اللي نزلت عليهم مرة واحدة دي
طب انا بصراحة مش قادر اصمد خلاص انا هادخل اريح شويه وانتوا احرار ماحدش يرجع يقولي ويشتكي انه مش نام وتعبان
ياسيدي مش هانشتكي خش انت وربنا معاك. خللي بالك من نفسك
حسسوني اني رايح العراق او واخدني جوانتامو كان ناقص يودعوني والدموع ف عينيهم
عادي جدا ياما انت كريم يارب هانام على راحتي من غير ازعاج النهاردة
اكيد يوم حظي
بصراحة كنت ف حالة يرثى لها فلما دخلت الكرافان ولاقيت التراب ماليه كأنه قصر مهجور بقالة 100 سنه قلت عادي جدا
نفضت السرير اللي هانام عليه وقمت مرمي عليه مقتول
نمت اد ايه ؟
مش عارف بس قمت على صوت زي اللي كنت بأسمعه لما اتمشى ف بلدنا بالليل
. بأمد ايدي اجيب الموبايل اشوف الساعة كام لقيت كتلة سواد على الحيطة فوق دماغي بالظبط
ايه الكوابيس دي انا بأحلم ولا ايه
بأفتح التليفون علشان ينور شويه لقيت سجادة سودا على الارض
ايه ده؟
انا لسه بأحلم باين
وبعدين ايه الضلمة دي كل حاجه حواليا سودا .
انا كده اكيد بأحلم
رجعت انام تاني وانا بأعدل البطانيه لقيت ف وشي صرصار على طرف السرير
صرصار واحد بس لكن تأثيره عليا كان كأنه تمساح
قمت قايم منفوض علشان اموته
بأدور على النور علشان مش يهرب وساعتها مش هأقدر امسكه واديله باللي ف رجلي
انا قلت الصرصار ده لازم يندم انه ضيع من عيني النوم ولازم يدفع جزاء غلطته
اخيرا لقيت مفتاح النور
استعد ياصرصار وخد اخر نفس ليك ف الدنيا
دوست على المفتاح وياريت ايدي اتقطعت قبل ما تتمد على المفتاح
لقيت نفسي محاصر بين اكتر من 10 مليون صرصارمرة واحدة بمختلف الاحجام
اكيد دول عيلة الصرصار المسكين اللي كنت ناوي استفرد بيه
عرفوا عن نواياي تجاه اخوهم فقالوا ييجوا يحموه
انا قمت بعلو صوتي وقايل انا متأسف ياجماعة
انا لسان وبس
ده انا اغلب من الغلب ومش كنت هاعمل حاجه
بس تقنع مين ياحاج
خلاص هما جايين وناويين على الشر
طبعا متخيلين حالتي كانت عاملة ازاي
انا قاعد وسط فيلم رعب يا جماعة
انا سامع صوت من بعيد بيقولي طب ما تجري
وهو تفتكروا انا مستني النصيحة. والله حاولت بس حسيت بشلل مؤقت ف جهازي العصبي .
اشارات المخ مش راضية توصل لرجلي علشان اتحرك
معقوووووول ؟
حتى الخلايا العصبيه بتاعتي تكون بتخاف من الصراصير
بعد عناء قدرت اطلع صوت
مجرد صوت
انادي بيه على اي حد ييجي ينقذني
وكأنهم كانوا على الباب
لقيت فرقة عمليات خاصة بتنتشلني من المكان وهما عندهم هيستيريا ضحك
الكلاب طلعوا عندهم خبرة وراحوا هناك قبل كده
المكان طلع معروف يا جماعة وانا كنت الزبون الجديد اللي الحفلة عليه الليله دي
بعد ما شربت شوية مية وخدت نفسي واطمنت على ان كل حاجه ف جسمي سليمة لقيتهم مجهزين ليا مكاني
جوه العربية
posted by ولــــــــــو @ 1:40 AM
17 Comments:
لاقيت صوره للبوست فين؟
أيه ده كل ده عشان حتة صوريصار على رأي لينا
هما أي نعم كائنات مقرفه
بس برضه ده لو راح أو جيه صوريصار
اسكت يا واد يا حاتم ده أنا في مره كده من مرات الزهق أخدت بعضي وراحت السينما وشفتلك حتة فيلم يا واد كان البطل وراجل سيكو كده لأقى فار في البيت أتصاحب عليه وبعد شويه بقى عندي جيش من الفئران كان بيخليهم ينتقموا من أي حد مش عاجبه
وفضلت اسبوع متنح من تأثير الفيلم
فيران يا بابا مش تقولي شويه صراصير
مممممم
يعنيييي
من الآخر... مش عارفة أقول غير يعععععع
:))
لما تلاقي كورال طيب حنين كدة إياك تثق فيهم في أي وقت من الأوقات
بس بجد
يع
وحش أوي
:)
دة فعلا فيلم رعب بس... وحش أوييي. يارب عمري ما أشوف ربعه حتى
المرة الجاية ابقى خلص نفسك و نام في العربية :) واقفل الأبواب عشان أصحابك يناموا في الصحرا لوحدهم
عارف؟؟ أنا في قمة استغرابي حاليا لأني كنت لسة بفكر في الصراصير النهاردة!! آه والله بجد، بس اللي فكرني الحقيقة هوصفحة في جرنان الدستور عن الحشرات. ساعتها افتكرت زميلة في الجامعة قالت إن أمنيتها لوكانت حاجة غير إنسان.. إنها تكون "صرصااار" ووسط ردودالأفعال المرعوبة منها،قالت عشان لوجه زلزال أوكارثة..الصرصار بس اللي بيفضل عايش. تفتكر ممكن تتمنى كدة لحظة في حياتك؟؟
:)
واضح إن زمايلك دول لظاظ لظاظ لظاظ .. معلش أنا مش عارفة ليه ده كله بيحصلك انت بالذات .. ربنا يزيح يابنى .. بس برضه بتضحكنى :)
و علشان تحرم تستقوى على الصراصير تانى
مالها الصراصير
حاجات صغننة وكميلة وهادية
مش بتعمل حاجة يعنى
فاكر المسلسل بتاع اكس فايلز اللى انوا بيجيبو فيه الحشرات بتتجمع حوالين البنى آدم وتلتهمه
عااااااااااااا
ايه يا بنى اللى بيرجالك ده
انا لو منك ارجع واعيش عاطل واقعد فى بيت ابويا احسسن من المرمطة دى
بس ربنا يوفقك والله وربنا شاهد ومطلع وهيعوض عليك بإذنه
=============
لذيذ قوى على فكرة موضوع اخينا بتاع البدو اللى جه ينام جنبك
واضح ان انت عندك مشكلة فى النوم
ابقى خد منوم علشان متدراش بأى حاجة
سلام يا مطحون يا ذى الحظ العسر
هبة
يعععععععععععععععععععععععععععع
انا كنت مت من اول صرصار
يومياتك حلوة اوى
انت تتعذب واحنا نضحك
:)
انسان مقيد
اللي يدور يلاقي
بس يكون بيدور بضمير
واخد بالك
بيدور بأيه؟
تمام
وكفايه كده
حتة صرصار؟!!!
ماهو اللي مش يعرف يقول
هو بيقول ايه اللي مايعرفش؟
اكيد بيقول مااعرفش
ماعلينا
الفيلم ده انا فاكره كويس
انا مش شفته بس بصراحة كرهته منك
ماله يوسف شاهين
اهو مش هاتفهم حاجه بس اهو ابن بلدنا ولازم نقف جنبه
فيران يا بابا ؟
يابني انت فاكر انها صراصير من اللي نعرفها
لا خالص ابسلوتلي
انا بس اللي باسهلك الموقف
انا غلطان
المرة الجايه هاوصفلك مصحوبا بالصور
اتمنى ابقى صرصار ؟
طب ده سؤال برضه
انا اتمنى الدنيا تتهد من حواليا ولا اني ابقى صرصار
ده على رأي محمد هنيدي
ده ف بلدنا بيضربوه بالشبشب
وبعدين كل ده يعععععععععععععععع
امال لو شفتيني بقى ساعتها كنت باصوت زي ال..... ولا بلاش
ربنا امر بالستر
بس الصراحة
يعععععععععععععععععععععععع
الرد اللي فات مش عارف اسمك راح فين
على العموم اكيد عرفتي انه ليكي
بس من الامانه اني برضه اكتب انا باعت الكلام لمين
الى
wish i were a butterfly....
مع الشكر
بيقولوا سايكو
وانهي لظاظة
دي لظاظه فاقت الوصف
كلاااااااااب
مش عارف صحيح ليه بيحصلي ده
واحد صاحبي بيقولي ده تكفير ذنوب
اتمنى يكون كده
وبعدين والله ما استقويت
دا انا غلبااااااااان
وبعدين انا كلام من غير فعل
حتى الكلام نمنعه كمان
بتضحكي ؟
ماااشي
المهم انك تضحكي
ومش مهم انا يحصلي ايه
doba
حلو اوي شوية التعاطف اللي ماليين البلوج دول
حقيقي يعني
وبعدين انا اللي حصلي مش ينفع يتحكي ولا يتشاف
عارفه اسوأ كابوس ممكن تشوفيه
انا كنت فيه
اه والله
ياريتني فضلت عاطل
بس لا مش موقف زي ده اللي يعطلني
اقل من كده بكتيييييييير
break
انا اتعذب وانتوا تضحكوا
صح
هي دي قسمة العدل
المفروض ادعي على المفتري وكده ولا ايه
ههههههههههههههههههه
بجد ان والله حلمت مرة كابوس زى دة الخالق الناطق
و بره كان عندى شلل مؤقت
و صدقنى اعدت تعبانه من الكابوس ده يومين ادام
بس كان المفروض من الاول تعرف انهم مدبرين لك كمن
الحياة مابتبقاش حلوة اوى كده
:)
هههههههههههههه
ههههههههههههههه
ههههههههههههههههه
على شان تحرم ماله ماتش
الجونة والحناوي ف ربع نهائي دوري المظاليم
يس والله جامد جدا موضوع الصرصار ده
ههههههههههههههههه
يعععع
طب وما ليك عليا يمين
انا لو مكانك كانوا هيطلعونى جثثثثثثثه
اسلوبك تحفه ياحاتم
ربنا معاك يارب
:))
انا بقى هقولك على الاحساس اللى جالى وانت بتوصف
اولا بصرف النظر عن انك بجد صعبت عليا فى الموقف ده ماهو اصل اللى مايعرفش يقول عدس زى ما بيقولوا
احساسى بجد انى اتقرفت ونفسى غمت عليا قوى بجد .يالهوى سراسير ؟؟!!!
اخييييييه
وبعدين ياراجل بذمتك حد يركب لانوس فى الصحرا ؟؟؟؟!!!!
ربنا يكون فعونك بس اكيد من بعد اليوم ده بطلت تنام هههههههههههههه
Post a Comment
Subscribe to Post Comments [Atom]
<< Home