ده متسمي على اسمي
واحنا رايحين لموقع بير كان محتاجنا كان لازم نمشي حوالي 1.5 كم تقريبا ف مدق - وده عبارة عن طريق مش مسفلت ومش ممهد ومش مستوي ومش كل حاجة ومليان طوب ورمل وحصى وبلاوي زرقا وطبعا كمان ف وسط الصحرا مش ف شرم الشيخ بلازا يعني - المهم الطريق ده علشان نقدر نمشي فيه لازم العربيه تمشي بسرعة لا تتجاوز ال 10 كم/ساعة مع العلم ان العربيه مجهزة وامكانيات عالية وسواق محترف وكده بس نعمل ايه بقى
واحنا ف طريقنا للموقع ظهر قدامنا قافلة جمال - وللعلم الجمال هناك اكتر من البني ادميين - مش عارف ظهروا منين ورايحين على فين
اللي عرفته بعد كده ان القافلة دي كانت من النوق الحمر اللي عنترة كان خطفهم من الملك النعمان علشان مهر عبلة
الغبي كان جه مطروح لم اللي عايزه ماهم مترميين ف الصحرا بدل ما يتبهدل البهدلة دي
ما علينا
القافلة دي كان ماشي قبلها بمسافة جمل سابقهم اتقالي ساعتها ان اسمه الجرار وده الدليل من الآخر او القائد اللي باقي القافلة بتمشي وراه
المهم ان احنا متأكد علينا اننا بلاش نلعب مع الجمال بمعنى انه لو حصل حاجه زي اللي بأحكي عليها نقوم راجعين او واقفين لحد ما الجمال تاخد قعدتها وتمشي ف امان الله علشان نأمن شرها من ناحية ومن ناحية تانيه لحسن تكون ملك حد غبي يطلع علينا ويخطفنا ويطلب فدية ولا حاجة وساعتها مش هانلاقي اي مخلوق ممكن يدفع ف اتخن واحد فينا ربع جنيه مخروم
فطبعا اول ما شفنا عفيفي - وده الاسم اللي اطلقته على الجمل القائد من باب التريقة - قمنا مهديين السرعة اكتر علشان الباشا يعدي بس طبعا لأنه جمل اصيل فكان ماشي ابطأ من السلحفاه
ممل بجد
فأنا ربنا مش هداني على طيب ولساني المتبري مني قعد يتريأ على الحاج عفيفي
وكأنه سمع الكلام
مش عارف لقيته وقف فجأه وقام ملتفت قدام العربيه بالظبط وبص علينا نظرة فيها شر
فجأة السواق قام قايل اقفلوا الازاز بسرعة ولانه من اهل مطروح وهو ادرى منا بالجمال ومعاشرهم طول عمره قمنا قافلين الازاز بطريقه لا اراديه وبعدين استعدت الذاكرة وسألته : خير ؟
قام السواق قال : الجمل حطنا ف دماغه وقام موقف العربية
انا برضه مش اتنيل واسكت قمت مكمل : ان ان اااااااان ياعم حطنا ف دماغه مين ! ده جمل
لقيت الجمل فعلا جاي علينا فطبعا احنا اتاخدنا من الموقف
ياجماعة ده جمل مش بطه بلدي برضه
الجمل قام مكمل طريقه لحد مابقى قدام العربية بالظبط وقعد يلف حوالينا ويدور وانا طبعا مش عايز اوصف حالتي كانت ايه ساعتها
المهم السواق قال ماحدش يبص له علشان يمشي بسرعه فمحدش بص
كله بص قدامه ولا كأننا تلاميذ ومتذنبين والزبون عفيفي عمال يلف ومش راضي يمشي
وفجأه
قام لازق وشه ف الازاز بتاع الكرسي بتاعي
انا طبعا اترجيت ف مكاني
ايه يا جدعان! النظام كده مش باين عليه خير
اللي بنعمله ف الناس هايطلع علينا ولا ايه
السواق قام قايلي : لف وشك ناحيته ببطء
انا نفذت التعليمات بالحرف كأني عسكري أمن مركزي ف مظاهرة ف ميدان التحرير
وبعدين قام السواق مكمل : ابتسم وخللي السعادة تملى وشك
وطبعا عملت كده وانا باقول ف سري ايه الحوار الفاشل ده ما اقوم ارقصله بالمرة
لقيت الجمل قام ضحك انا بصراحه قلّـقت وقلتلهم الجمل ده مش ولابد ولا ايه؟
قالولي : ده مش جمل ده جملة (ناقة يعني ) فقلت :اوباااااااااااه
وكملوا : وحامل كمان
الناقه طلعت جايه تتوحم عليا
فلو لقيتوا جمل شبهي سلموا عليه وعاملوه كويس ولو سألتوه على اسمه هايقولكوا ان اسمه
ولــــــــو
اصله متسمي على اسمي..
posted by ولــــــــــو @ 7:32 PM
24 Comments
