القوي فيه اللي أقوى منه
مش عارف اشمعنى بيحصل معايا كده؟
انا من بين 75 مليون فرد بيلازمني حظ لذيذ جدا
طبعا الاسبوع كله كان اكتر من متعب بس كله يهون بالمقارنة بال ويك إند
طلعنا من الموقع اللي كنا فيه علشان طلبونا ف موقع تاني
مش مهم اني مش نمت الاسبوع كله الا اقل من 12 ساعة ومش مهم البهدلة والارهاق ومش مهم بُعد المسافات بين المواقع ومش مهم ان العربيه لانوس والمطب معاها بيلزقني ف السقف فما بالك الصحرا والطوب والحصى والبلاوي الزرقا دي
لكن على الاقل نراعي شوية بقى والظروف مش تبقى كلها واقفة ضدي كده
وصلنا الموقع حوالي الساعه 7 بالليل وطبعا كنت بأنهار كالعاده . المهندس المسئول قال مش هانشتغل غير بعد ساعتين قلت اشطه جدا انا مش محتاج اكتر من كده
أديها ترييح علشان اللي هاشوفه بعد كده هايعلمني الادب وكمان الجو تلج فالواحد يلحق يتمتع شويه بالسخونه واحساس الدفء
الراجل ظبّطنا بصراحة
ادانا كرفان فيه اربع سراير مره واحدة. كتر خيره مع اني استغربت
العادي انهم يقولوا مفيش اماكن والعدد محدود واغتنم الفرصة واحجز مقدما والكلام بتاع مسرحيات القطاع الخاص ده بس الراجل اكيد رأف بحالنا لما شاف الحاله المزريه الللي احنا عليها
طبعا راجع للرجالة كأني فتحت عكا
معايا كرفان اربع سراير مرة واحدة دي حاجة تتكتب ف تاريخ الشركة
انا بأقول بكل براءة : يالا يارجالة ننام
لقيت كلهم ف نفس واحد كأني ف كُـتّـــاب الشيخ محفوظ : لأ ياعم مش جايلنا نوم احنا هانقعد ف العربية شويه لحد معاد الماتش
انا بأستغراب من النهم الرياضي اللي ظهر عليهم فجأة: ماتش مين النهاردة؟
قالوا: ماتش الجونة والحناوي ف ربع نهائي دوري المظاليم
انا وعلامات الدهشة ماليه وشي: مظاليم ليه كفالله الشر ؟ ومين اللي ظلمهم لا سمح الله وبعدين دي فرق ف مصر هنا؟
برضه كلهم ف نفس واحد يدل على أداء جماعي رائع: انت ايه فهمك ف الكورة اصلا خليك مع برشلونة اللي هاياكل دماغك
خش انت نام انت بقالك اسبوع مش نمت
ياربي ايه الحنية اللي نزلت عليهم مرة واحدة دي
طب انا بصراحة مش قادر اصمد خلاص انا هادخل اريح شويه وانتوا احرار ماحدش يرجع يقولي ويشتكي انه مش نام وتعبان
ياسيدي مش هانشتكي خش انت وربنا معاك. خللي بالك من نفسك
حسسوني اني رايح العراق او واخدني جوانتامو كان ناقص يودعوني والدموع ف عينيهم
عادي جدا ياما انت كريم يارب هانام على راحتي من غير ازعاج النهاردة
اكيد يوم حظي
بصراحة كنت ف حالة يرثى لها فلما دخلت الكرافان ولاقيت التراب ماليه كأنه قصر مهجور بقالة 100 سنه قلت عادي جدا
نفضت السرير اللي هانام عليه وقمت مرمي عليه مقتول
نمت اد ايه ؟
مش عارف بس قمت على صوت زي اللي كنت بأسمعه لما اتمشى ف بلدنا بالليل
. بأمد ايدي اجيب الموبايل اشوف الساعة كام لقيت كتلة سواد على الحيطة فوق دماغي بالظبط
ايه الكوابيس دي انا بأحلم ولا ايه
بأفتح التليفون علشان ينور شويه لقيت سجادة سودا على الارض
ايه ده؟
انا لسه بأحلم باين
وبعدين ايه الضلمة دي كل حاجه حواليا سودا .
انا كده اكيد بأحلم
رجعت انام تاني وانا بأعدل البطانيه لقيت ف وشي صرصار على طرف السرير
صرصار واحد بس لكن تأثيره عليا كان كأنه تمساح
قمت قايم منفوض علشان اموته
بأدور على النور علشان مش يهرب وساعتها مش هأقدر امسكه واديله باللي ف رجلي
انا قلت الصرصار ده لازم يندم انه ضيع من عيني النوم ولازم يدفع جزاء غلطته
اخيرا لقيت مفتاح النور
استعد ياصرصار وخد اخر نفس ليك ف الدنيا
دوست على المفتاح وياريت ايدي اتقطعت قبل ما تتمد على المفتاح
لقيت نفسي محاصر بين اكتر من 10 مليون صرصارمرة واحدة بمختلف الاحجام
اكيد دول عيلة الصرصار المسكين اللي كنت ناوي استفرد بيه
عرفوا عن نواياي تجاه اخوهم فقالوا ييجوا يحموه
انا قمت بعلو صوتي وقايل انا متأسف ياجماعة
انا لسان وبس
ده انا اغلب من الغلب ومش كنت هاعمل حاجه
بس تقنع مين ياحاج
خلاص هما جايين وناويين على الشر
طبعا متخيلين حالتي كانت عاملة ازاي
انا قاعد وسط فيلم رعب يا جماعة
انا سامع صوت من بعيد بيقولي طب ما تجري
وهو تفتكروا انا مستني النصيحة. والله حاولت بس حسيت بشلل مؤقت ف جهازي العصبي .
اشارات المخ مش راضية توصل لرجلي علشان اتحرك
معقوووووول ؟
حتى الخلايا العصبيه بتاعتي تكون بتخاف من الصراصير
بعد عناء قدرت اطلع صوت
مجرد صوت
انادي بيه على اي حد ييجي ينقذني
وكأنهم كانوا على الباب
لقيت فرقة عمليات خاصة بتنتشلني من المكان وهما عندهم هيستيريا ضحك
الكلاب طلعوا عندهم خبرة وراحوا هناك قبل كده
المكان طلع معروف يا جماعة وانا كنت الزبون الجديد اللي الحفلة عليه الليله دي
بعد ما شربت شوية مية وخدت نفسي واطمنت على ان كل حاجه ف جسمي سليمة لقيتهم مجهزين ليا مكاني
جوه العربية
posted by ولــــــــــو @ 1:40 AM
17 Comments
